सलमानले रानु मण्डललाई ५५ लाखको घर किनिदिएको समाचार झुटो, यस्तो छ वास्तविकता

एजेन्सी। रेलवे स्टेशनमा गाएको गीतका कारण भाइरल भएर रियालिटी शोसम्म पुगेपछि चर्चामा रहेकी भारतीय गायिका रानु मण्डललाई सलमान खानले ५५ लाखको घर किनिदिएको खबर केही दिनदेखि भाइरल भएको छ । तर, यो समाचार झुटो भएको पाइएको छ । अहिले भारतीय मिडियामा सलमान खानले रानुलाई कुनै उपहार नदिएको समाचार प्रकाशित भएको छ।

कोलकात्ताको राणाघाटमा रहेको ‘अम्रा शोबई शोइतान क्लब’का सदस्य विक्की विश्वासले सलमानले रानुलाई कुनै उपहार नदिएको प्रस्ट पारेका हुन् । विक्कीले भनेका छन्, ‘हाम्रो क्लबका दुई सदस्यले रानु मण्डलको भिडियो राणाघाट रेल्वे स्टेशनमा खिचेका थिए, जुन सामाजिक सञ्जालमा भाइरल भयो । त्यतिबेलादेखि हामीले नै रानु मण्डलको रेखदेख गरिरहेका छौँ । सलमान खानले ५५ लाखको घर उपहार दिएको हामीलाई थाहा छैन । यो फेक न्यूज हो, जुन सामाजिक सञ्जालमा फैलाइएको छ ।‘

यद्यपी हिमेश रेशमियाले भने रानु मण्डलका लागि धेरै गरेको विक्कीले बताए । हिमेशले उनलाई मुम्बई आउने–जाने खर्च व्यहोरेको उनले जानकारी दिए । विक्कीका अनुसार रानु मण्डललाई अहिलेसम्म सोनी टिभीको रियालिटी शो ‘सुपरस्टार सिंगर’ मा भाग लिए बापत जे–जति रकम प्राप्त भएको थियो उनले पाएको त्यति मात्र हो । त्यसबाहेक रानुलाई अरु कसैबाट सहयोग भएको छैन ।

र यो पनि पढ्नुहोस्

‘रेल वे स्टेशन’मा गीत गाउँदा रानुको जीवन नै बदलियो

रेल वे स्टेशनमा बसेर रानु मण्डलले गाएको एक गीत भाइरल भयो । लता मंगेशकर जस्तै गाउन सक्ने रानुका फ्यान लाखौ भए । उनले ‘एक प्यार का नग्मा हे’ बोलको गीत गाएकी थिइन् । रेल वे स्टेशनमै बसेर उनले गीत गाएर गुजारा चलाउँदै आएकी थिइन् ।

रानुले गाएको भिडियो अतिद्र चक्रवती नाम गरेका एक युवाले खिचेर सामाजिक संजालमा पोष्ट गरेका थिए । रानुले गाएको मन परेकाले उनले भिडियो खिचेका थिए । उनले पोष्ट गरेको केही समयमा नै भिडियो भाइरल भएको थियो । रानुको स्वरको चौतर्फी चर्चा भयो । भिडियो भाइरल भएपछि उनीमाथि संगीत क्षेत्रका हस्तीहरुको पनि आँखा पर्यो । रानुलाई गायक तथा संगीतकार हिमेश रेशमियाले पहिलो पटक गीत गाउने अवसर दिए । उक्त गीत रेकर्ड भएपछि अहिले रानुको माग निकै बढिरहेको छ । बलिउड चलचित्रदेखि भोजपूरी चलचित्रका मेकरले समेत उनलाई अफर गरिरहेका छन् ।

रानु मण्डल बिबाहित थिइन् । बब्लु मण्डलसँग उनको बिबाह भएको थियो । बिबाहपछि उनीहरु मुम्बईमा बस्दै आएका थिए । सबै राम्रै चलिरहेको थियो । तर, अचानक श्रीमानको मृत्यु भएपछि रानु बेसाहारा बनेकी थिइन् । श्रीमानको मृत्यु पछि रानु आफ्नो माइती गाउँ रानाघाट फर्किइन् । फर्किएर उनले गीत गाउन सुरु गरिन् । गीत गाएर नै उनी आफ्नो जीवन चलाइरहेकी थिइन् ।

रानुको एक छोरी थिइन् । तर, आफ्नो बुबाको मृत्युपछि आमाले स्टेशनमा गीत गाएको उनलाई मन परेको थिएन । त्यसैले उनले आमाको साथ छोडेकी थिइन् । अहिले भिडियो भाइरल भएपछि छोरी पनि आमाको साथमा आएकी छिन् ।
उनलाई नायक सलमान खानले ५० लाखको घर उपहार दिएका छन् । रेल वे स्टेशनमा गाएको एउटा गीतले रानुको जीवनचक्र नै फेरिदिएको छ ।

प्रकाशित मिति August 31, 2019

प्रतिकृया दिनुहोस