असार १ गतेदेखि देशभरका विद्यालय खुल्ने, यस्तो छ सरकारी निर्णय

सूचना दैनिक
शुक्रबार, जेष्ठ ३०, २०७७

काठमाडौं – सरकारले कोरोना भाइरस संक्रमण रोकथामका लागि गरेको लकडाउन खुकुलो पार्ने निर्णय गरेसँगै असार १ गतेदेखि देशभरका विद्यालय खुल्ने भएका छन् ।

मन्त्रिपरिषद् बैठकका निर्णय बिहीबार सार्वजनिक गर्दै सरकारका प्रवक्ता तथा सञ्चारमन्त्री डा. युवराज खतिवडाले असार १ गतेदेखि विद्यालयका कार्यालय खोल्न पाइने जानकारी दिए । विद्यालय कार्यालय खोले पनि पठनपाठन भने सञ्चालन हुने छैन ।

शिक्षा, विज्ञान तथा प्रविधि मन्त्रालयले भने वैकल्पिक पठनपाठनका लागि प्रविधिको पहुँच नभएका विद्यार्थीलाई विद्यालयमा समूहगत रुपमा बोलाएर सामाजिक दूरी कायम गर्दै पठनपाठन गर्न सकिने निर्देशिका जारी गरेको छ । प्रविधिमा पहुँच भएका विद्यार्थीलाई रेडियो, टेलिभिजन, कम्युनिस्ट, मोबाइलबाट पठनपाठन गर्न सकिने भए पनि प्रविधिमा पहुँच नभएका विद्यार्थीलाई विद्यालयमा पठनपाठन गर्न सकिने विकल्प खुला राखिएको छ ।

सरकारले २०७६ चैत ११ गतेदेखि गरेको लकडाउन आज बिहीबारबाट खुकुलो भएको छ भने असार १ गतेबाट झन् खुकुलो हुने भएको छ । प्रवक्ता खतिवडाका अनुसार सरकारले पहिलो चरणमा २१ दिनका लागि लकडाउन केही खुकुलो पार्ने निर्णय गरेको छ ।

सरकारी निर्णय अनुसार उद्योग, कलकारखाना, सरकारी र निजी कार्यालय सञ्चालन गर्न सकिने भएको छ ।

यस्ता छन् खोल्न मिल्ने क्षेत्रहरू

– फोहोरमैला व्यवस्थापन

– विद्युत, दमकल, सञ्चार र हुलाक सम्बन्धी कार्यालय र सवारी साधन,

– बैंक तथा वित्तीय संस्था, सहकारी र बिमा,

– नर्सरी र वन जन्य उद्यम खुला भएको छ । (कृषिकै अंगको रुपमा चल्ने भएकाले खुला गरिएको हो) ।

– विकास आयोजना निजी क्षेत्रबाट प्रवद्धित पूर्वाधार र जलविद्युत् आयोजना निर्वाध सञ्चालन गर्ने,

– नदी तथा खानीजन्य पदार्थको उत्पादन, संकलन र बिक्री वितरण खुला,

– रेस्टुरेन्ट खान ल्याउर सेवा लिन सकिन्छ । प्याकिङ खान परिवारसँग खान सकिन्छ र खाना संकलन गर्न सकिन्छ तर रेस्टुरेन्टमा बसेर खान पाइँदैन ।

– क्वारेन्टाइनका लागि तोकिएका होटल र त्यसका यातायात साधन सञ्चालन गरिने अन्य सञ्चालन नगर्ने ।

– सरकारी कार्यालय,

– शिक्षण संस्थाका कार्यालय,

– गैरसरकारी संस्थाका कार्यालय (सबै कार्यालय यातायात र कार्यस्थलमा सामाजिक दूरी कायम गर्दै सञ्चालन गर्नुपर्नेछ । कार्यालय दुई सिफ्ट बिहान ८ देखि दिउँसो १ बजेसम्म र दिउँसो १ बजेदेखि साँझ ६ बजेसम्म) पूर्ण रुपमा सञ्चालन गर्न पाइने छ,

– जोरबिजोर प्रणालीमा सञ्चालन हुने गरी निजी कार्यालयका सवारीसाधन श्रमिकको आवगमनका लागि सञ्चालन गरिने । यसरी सञ्चालन हुने सवारीसाधनको सिटको एक लहरमा एकजना मात्र यात्रु राख्न पाइने छ । गाडीमा सवार सबैले मास्कसँगै सबै स्वास्थ्य सुरक्षाका मापदण्ड उपयोग गर्नुपर्नेछ,

(सञ्चालन हुने कार्यालय र उद्योग क्षेत्रलाई सम्बन्धित मन्त्रालयले जनस्वास्थ्य र सुरक्षा मापदण्डका लागि प्रोटोकल लागू गर्नुपर्नेछ ।

– यी सबै निर्णय असार १ गतेदेखि लागू हुनेछन् ।

यी १३ क्षेत्र सञ्चालनमा रोक

– शैक्षिक संस्था (विद्यालय, विश्वविद्यालय, ट्युसन सेन्टर र तालिम केन्द्र),

– अनुमति प्राप्तबाहेक आन्तरिक र अन्तर्राष्ट्रिय उडान,

– तोकिए बाहेकका अन्तराष्ट्रिय सीमा नाकाबाट हुने आवतजावत,

– सबै प्रकारका तालिम, गोष्ठी, सभा र सेमिनार,

– सबै प्रकारका प्रदर्शन भेला र सम्मेलन,

– सिनेमा हल, पार्टी प्यालेस, डान्स बार लगायतका मनोरञ्जनस्थल,

– सार्वजनिक पुस्तकालय, संग्राहालय, चिडियाखाना, शैलुन र ब्युटीपार्लर,

– स्विमिङ पुल, जिमखानालगायत हेल्थ क्लब,

– शपिङ महल,

– समूहमा खेलिने खेलकुद र खेलमैदानमा हुने प्रस्तुति,

– सबै धार्मिक तथा सार्वजनिक स्थलहरू,

– यात्रुबाहक सवारीसाधन (त्यसमा पर्यटक सवारी साधन समेत),

– काठमाडौं उपत्यकाको हकमा उपत्यकाभित्र र अन्य जिल्लाको हकमा सोही सम्बन्धित जिल्लाभित्र मात्र जोर बिजोर प्रणालीमा निजी सवारीसाधन सञ्चालन हुने । अन्य क्षेत्रमा यो निर्णय लागू नहुने ।