पर्वत पहिरो अपडेट : श्रीमान श्रीमतीसहित ४ को मृत्यु (फोटोफिचर)

सूचना दैनिक
आइतवार, जेष्ठ ३२, २०७७

पर्वतको कुश्मा नगरपालिका–३ दुर्लुङको ढकालबारीमा शनिबार साँझ परेको भीषण वर्षासँगै माथिबाट आएको पहिरोले परिँदा ४ जनाको मृत्यु भएको छ भने ५ जना अझै बेपत्ता छन् ।

बेपत्ताहरुको खोजीकार्य भैरहेको छ ।

शनिबार साँझ परेको मुसलधारे वर्षापछि आएको पहिरोमा पुरिएर कुश्मा नगरपालिका ३ काफलचौरका ५२ वर्षीय तुल बहादुर थापा, उनकी श्रीमती ५२ वर्षीया मिनकुमार थापा, उनकी नातिनी ८ वर्षीय बिबिसा थापा र अर्का एकको पनि शव फेला परेको छ भने सम्राट थापा, दीपा थापा, विवेक थापा, कमला विक, जेनिस विक र प्रमिसा विक बेपत्ता छन् । थापाको घरमा ६ जना रहेको कुस्मा नगरपालिका वडा नं ३ का अध्यक्ष तेज प्रसाद पाध्याले जानकारी दिए ।

बिहान २ बजेसम्म सुरक्षाकर्मीले खोजी जारी राखेका थिए । अहिले बिहानैबाट पनि थप सुरक्षाकी उद्धार र बेपत्ताको खोजीमा जुटेका छन् ।

पर्वतको कुश्मा नगरपालिका–३ दुर्लुङको ढकालबारीमा शनिबार साँझ परेको भीषण वर्षासँगै माथिबाट आएको पहिरो ।

बेपत्ता हुनेहरुको स्काभेटर प्रयोग गरी खोजि कार्य गरिरहेको जिल्ला प्रहरी कार्यालय पर्वतले जनाएको छ । घटना घटे लगत्तै नेपाल प्रहरी, नेपाली सेना, ससस्त्र प्रहरी र स्थानीय उद्दारमा खटिएका छन् ।

पहिरोले २ घर र ६ गाईबस्तु बगाएको छ भने घटना स्थल नजिकै रहेका अन्य ३ घर परिवार जोखिममा परे पछि अन्यत्र सुरक्षित स्थानमा सारिएको प्रहरीले जनाएको छ ।.

पहिरोमा बेपत्ता भएकाहरुको खोजी कार्ग गर्दै नेपाली सेना सशस्त्र प्रहरी र स्थानीयबासीहरु ।
जिल्ला प्रहरी कार्यालय पर्वतका प्रमुख डिएसपी बिश्वराज अधिकारीका अनुसार राती २ बजे सम्म खोजी गरिएको र अहिले बिहानै देखि स्थानिय तथा सुरक्षाकर्मीले खोजी जारी राखेका छन ।

राती २ बजे पनि पानी परिरहेको र अध्याँरोका कारण खोजी गर्न कठिन भएको थियो । बिहानै देखि नेपाल प्रहरी, शसस्त्र प्रहरी र नेपाली सेनाको टोलीले घटनास्थलमा उद्दार र खोजीको काम थालेको उनको भनाई छ ।

शनिबार साँझदेखि परेको वर्षाका कारण राति ९: ०५ बजे अचानक पहिरो गएको थियो ।

भीषण वर्षासँगै माथिबाट आएको पहिरो ले पुर्याएको क्षति ।
झन्डै २० वर्षअघि खनिएको गाउँमाथिको मोटर बाटो झरेको पहिरोले एकै ठाउँका तीन घर बगाएको हो। दुईवटा घरको भने निसान समेत नरहने गरी पुरिएको प्रहरीले बताएको छ।