सुन बेच्नेको घुँइचो लागेपछि महासंघले भन्यो– ‘धान्न सकिँदैन’

सूचना दैनिक
आइतवार, जेष्ठ ३२, २०७७

काठमाडौं । नेपाल सुनचाँदी व्यवसायी महासंघले सुन बेच्न चाहने सबै ग्राहकहरुको सुन किन्न नसक्ने जनाएको छ । बजारमा सुनचाँदीको भाऊ निकै बढसँगै सुनका गहनाहरु बेच्न आउनेको घुइँचो लागेपछि महासंघले विज्ञप्ती जारी गरी सबै ग्राहकको सुनको फिर्ता बिक्री गर्न आएमा बजारले धान्न नसक्ने स्पष्ट पारेको हो ।

कोरोनाको कारण अन्तर्राष्ट्रिय मुद्रासँग नेपाली मुद्राको अवमूल्यन भएको तथा सुनमा लाग्दै आएको भन्सार राजश्व वृद्धि भएका कारण सुनको मूल्य बढेको उल्लेख गर्दै महासंघले ग्राहकहरुलाई धैर्यधारण गर्न आह्वान गरेको छ । साथै सरकारलाई नीतिगत निर्णय गरी व्यवसायीहरुलाइ सहयोग गर्न आग्रह समेत गरेको छ ।

कोरोना महामारीसँगै घोषणा गरिएको लकडाउनपछि व्यसाय बन्द भएको अवस्थामा सुनचाँदी व्यवसाय क्षेत्र अरु व्यवसायजस्तै आक्रान्त भएको जनाउँदै महासंघले ६० अर्ब रुपैंया लगानी रहेको यो क्षेत्रलाई बचाउन सरकारसँग सहुलियतपूर्ण ऋण र ब्याज र दस्तुर मिनाहको माग समेत गरेको छ ।

आइतबार बजारमा छापावाला सुन प्रतितोला ८९ हजार ६ सय रुपैंया, तेजाबी सुन ८९ हजार १ सय ६५ रुपैंयाँ तथा चाँदी ९३५ रुपैंयामा कारोबार भइरहेको छ । लकडाउन हुनुअघि चैत १० गते सुनको मूल्य ७७ हजार रपैंया तथा चाँदीको मूल्य ७२० रुपैंया थियो । लकडाउन खुल्नेबित्तिकै उच्च मूल्यवृद्धि भएपछि यतिबेला सुनको फिर्ता बिक्री बढ्न थालेको हो । तर बिक्री भने यतिबेला ठप्पप्राय छ ।

सामान्यतया सुन किन्ने व्यक्तिले किनेकै पसलमा सुन बेच्न लगेमा त्यस्तो सुन किनिदिने गरेका थिए । तर भीड बढ्न थालेसँगै महासंघले यो अवस्था नरहेको जनाएको हो ।